استرالیا د «کار او رخصتۍ» ویزې لپاره د وړ هېوادونو یو لېست اعلان کړی چې د ځوانانو لپاره په دغه هېواد کې د لنډمهاله کار او سفر زمینه برابروي. د استرالیا د کورنیو چارو وزارت په وینا، دا ویزه عموماً د ۱۸ تر ۳۰ کلونو ځوانانو لپاره ده.
په دې لېست کې ارجنټاین، اتریش، برازیل، چیلي، چین، چک جمهوریت، اکوادور، یونان، هنګري، هند، اندونیزیا، اسرائیل، لوګزامبورګ، مالیزیا، منګولیا، پاپوا نیو ګیني، پیرو، پولنډ، پرتګال، سان مارینو، سنګاپور، سلواکیا، سلوانیا، هسپانیه، سویس، تایلنډ، ترکیه، اروګوای، امریکا او ویتنام شامل دي.
د دې ویزې له لارې وړ کسان کولای شي استرالیا ته سفر وکړي او د خپل سفر د لګښتونو د برابرولو لپاره قانوني لنډمهاله کار ترسره کړي. د کرنې او نورو موسمي کارونو زمینه هم د دې پروګرام له مهمو عملي فرصتونو څخه ګڼل کېږي.
خو د ویزې شرایط، عمر، د پاسپورټ هېواد، د غوښتنلیک نور اسناد او د ویزو کلنۍ ونډه باید د هر هېواد لپاره جلا وکتل شي. د استرالیا حکومت هم ویلي چې د غوښتنلیکونو د زیاتې غوښتنې له امله د ځینو هېوادونو لپاره پروسس ځنډېدلی شي.
